كم راح من عمري وانا ودي اتـوب

كم راح من عمري وانا ودي اتـوب
ولولا الهوى والنفس كان امس تايـب

عشرين عام امني النفس يـا ايـوب
لين اكتشفت اني مع الوقـت شايـب

راحت حياتي بين طالـب ومطلـوب
ولي خاطر(ن) لو طبت ماهوب طايب

واخاف من يوم به المـوت مكتـوب
لا حولوا بي بيـن عـوج النصايـب

في منزل مظلم عن الناس محجـوب
محجوب حتى عـن نسيـم الهبايـب

وصار الكفن يايوب يغني عن الثوب
وفارقت ربعـي والاهـل والقرايـب

ما عاد فيها جـاه وأمـوال وسلـوب
ولا عاد فيها حـب خشـم وطلايـب

ولا عاد حولي شمر ولا به حرووب
انـا وملائكـة الرضـاء والعقايـب

خدعني التسويـف وأغرتنـي دروب
من يامـن الدنيـا وغـدر النوايـب

يالله يا فـارج علـى كـل مكـروب
يا واحدٍ بامـرك تهـون المصايـب

يا من تقلب بيـن اصابيعـك قلـوب
خلقتها مـن بيـن صلـب وترايـب

يا غافر لمـن جالـك وكلـه ذنـوب
عبدٍ ضعيف وجـاك تايـب ونايـب

يا رب لو قلبي صخر عندك يـذوب
يامـن لهيبتـك الجبـل خـر ذايـب

اتوب ثـم اعـود واعـود واتـوب
ماهي عجيبه وانـت رب العجايـب

من المهد لين اللحد وقتـي محسـوب
ما ضاع شي وما بقى شـي غايـب

يارب مالي غير رحمتـك مطلـوب
من لي سواك ان جيت يـارب تايـب

كم راح من عمري وانا ودي اتـوب
ولولا الهواء والنفس كان امس تايـب
مماراق لي

يعطيك ألف عافيه على إبداعك

اججمل بيت عجبني :


كم راح من عمري وانا ودي اتـوب
ولولا الهواء والنفس كان امس تايـب

الله يرزقنا التوبه النصوح
وصح الله لسان كاتبها